කඩදාසි කොලේ

Wednesday, January 10, 2018

165. නෑර අත | not without you

සරදම් අහස මැද
ඔබ්බවා කළා සොලස සඳ
වලාකුළු තබා අඩයට
හැඩ බලයි නුඹ
හැමදාම සඳවත!

කඳුළු ඉහිරුණු මාවත
කටු පඳුරු - ගල් බොරළු ගැවසෙත
නෑර අත මා
හැමවිටම පපුතුරේ සඟවත!

පිල් විදා හල මොණරියක
විලක අධිපති හංසියක
වී සරමි මම
නුඹ මගේමයි පෙම්වත !

~~~ මන්ජි

189. ප්‍රේම සරතැස | love train

මැදිරි දෙක අතරතුර
කුඩා නැති ඉඩක,
මුදු හාදු ඉහිරවන්
දුර ගෙවා....

උඹ ගිහිං,
ඉල්ලුවේ කාගෙන්ද
මා ඉතිං ??

~~~ මන්ජි

Monday, December 18, 2017

163. උදුල් | Forever young

මේ සොඳුරු නැවතුම

අඳුර , හාදුද සමගින

ප්‍රේමය අඩු නැතුව උතුරන....

උදුල සඳවත පවා

විශ්මයෙන් අප දිහා බලාගෙන

ඉරිසියාවට උනත් සිනාසෙන....

තුමුල නිලබර සසොබන

රිවි කිරන ලෙස දිදුලන;

සොමි කිරන මා නහවන;

බදා වැළඳව ඉමි මම....

~~~මන්ජි

Wednesday, December 13, 2017

162. දඩයම සහ .... | predator

නිමිත්ත: දඩයක්කරුවෙකු නොවුවද තමන් දඩයක්කරුවෙකු වීම මැනවයි සිතූ අයෙක් අහසට දුනු දියෙන් අදිනලද සිය එකම හීය මුදාහරී.

පොතේ ගුරු:
"බලන්න මිත්‍රවරුනි ඔහුගෙන් අසා.. ඔහුගේ ඉලක්කය කුමක්දැයි"

ප්‍රේක්ෂකයෝ:
"අසිරිමත් පුරුෂය... ඔබ කුමන ආකාරයක දඩයක්කරුවෙක්ද? ඔබේ ඉලක්කය කුමක් වීද ?"

161. ඔබ අසල - ඇය | Not without her

ඉදින් ඇය ,
නුඹ අසල හිඳ
විටෙක ඔබ අත
ඉල්වනු ඇත....
විටෙක ඔබ උරතල
ලබාගනු ඇත....
විටෙක ඔබ මුදු
බැලුම් විඳිනු ඇත....

පහුරු ගානා හදවතින්
සිනාසෙමි මම;

මගේ අබලන් හදවතින්
පිරිමදිමි මම;

අයිතියද ,
අයිති කරුවාද ,
මුවාකර ඇති
තිරෙන් පසුපස
හඬාවැටෙමින්!
හිනා තලමින්!!

~~~~ මන්ජි

Sunday, November 19, 2017

160. ඉර මැදියම | burning

බලා සිටියෙමි
අදුර අතරින් ,
පිටමන්ව යන නුඹ
පහුරු ගාගෙන මගේ හිත,
වරක්වත් හැරී නොබලා
බලෙන් ඉල්වාගත්
හිස මත හාදුවද - තුරුළුකොට...

ආලයද , ප්‍රේමයද
හිම කිරම සේ දියව යන
මේ ඉර මැදියම,
සඳ පායන සිලිලාරට
හැමදාම දෙවනිවග
නුඹට වැටහෙනු
ඇත!

Monday, November 13, 2017

159. මැහුම් | saw through

බුමුතුරුණු වල,
මල්කම් කල සයන වල,
කුඩා - ලොකු මැස්මෙන්
මසමි ඉරුණු තැන්
එකින් එක....

ඒ මැහුම් අතර
සමහර තැන්වල
නොමැසෙන දාරවල
පැටලී වැටෙනු ඇත
ආදරය....