මට ඇහෙන සරින් - සිව්වන පරිච්ජේදය

 

අංජලිකා වෙල්ලාලගේ.. 

ඈ ගැන කෙලෙස; කුමක් කියන්නද? ළදරු පාසල් යන සමයේ සිටම එකම පංතිවල හෝ යාබද පන්තිවල සිටි ඇගේ මිතුරිය තවදුරටත් තමන් හඳුනනවාද? 

ඉතා ධනවත් ඉහළ පැලැන්තියේ සිටිනා මැණික් ව්‍යාපාරික කෝසල වෙල්ලාලගේ සහ ප්‍රකට නීතිවේදිනියක වූ සුගන්ධිකා වෙල්ලාලගේ නම් යුවලගේ කණිටු දියණිය වූ අංජලිකා , කලක් දරුවන් තුන් දෙනෙකුගේ පවුලේ බඩපිස්සීය. අමල් ඉන් මද්දුමයා ය. අංජලිකාට වඩා වසර හයකින් වැඩිමල් වූ අවන්තිකා වෙල්ලාලගේ හදිසියේ මියයන්නේ අංජලිකා පාසලේ දෙක වසරේ ඉගෙනුම ලබමින් සිටියදීය.

ඒ සිදුවීම සමඟ ඈ අසළ උන් හොඳම මිතුරිය ලෙස අංජලිකා මුහුණදුන් ඉරණම වඩාත් සමීපව දැනුනේ තමන්ට බව ජානුලී දනී. අවන්තිකා ඇගේ මව මෙන් දක්ශ, දිදුලන සමේ පැහැයෙන් යුතු තරුණියක්ව සිටියද අංජලිකා ඊට හාත්පසින්ම වෙනස් චරිතයක් වූවාය. 

මට ඇහෙන සරින් - තෙවන පරිච්ඡේදය

 

ජානුලීගේ දෙනෙත් බොඳවී යන්නට වූයේත්, දුරකතනය නාද වූයේත් එකවිටක වුවත් ඈ නැවතත් හුස්මක් ගෙන අත වූ කුඩා සටහන නැවත කියවූයේ එහි වූ පණිවිඩය මොළයට උකහාගන්නට මෙනි.

' ජානු,

සොරි මම හින්දා කරදර උනාට. මම හිතන්නෙ මට මේක විසඳගන්න පුලුවන්. උඹේ වෙඩින් එකට මම එනවා. ඒක පොරොන්දුවක්. දන්නවනෙ මේ අංජු පොරොන්දු කඩන්නෙ නෑ. මම යන්නේ විදුල්ව හොයන්න. බයවෙන්න එපා මේ මහනුවර ඇතුලේ මට කරදරයක් වෙන්නෙ නෑ. නැන්දාට කියන්න සමාවෙන්න කියලා එයාගෙ මහත්තයා අතේ කිසි වරදක් නෑ කියලා. 

මට සමාවෙන්න ජානු. මම උඹේ වොලට් එකෙන් සල්ලි ගත්තා. 

අංජු'